VEDTEKTER

Fylgjande vedtekter er fastsett for Partslaget Bakkejekta:

§ 1. Føremål

1. Byggje, eige og drive ei ny jekt som er replika av den originale Bakkejekta, - bygd etter same mål og handverksteknikkar som originalen.
2. 
   Den nye Bakkejekta skal byggjast og høyre til i Dalsfjorden og Ytre Sogn. Ho skal fremje interessa for kystkultur, historie og handverk i regionen, og knyte oss betre saman på tvers og langs av fjordar og fjell.
3. 
   Byggjing og drift av den nye jekta skal gi innsyn i, dokumentere og spreie kunnskap om materialval, byggjeteknikk, rigging og segling av slike jekter, - som i tidlegare tid var livsnerven mellom bygdene og mellom by og bygd.
4. 
   Drifta av den nye Bakkejekta skal og vere eit tilbod til lag, foreiningar og organisasjonar, med samanfallande føremål, - for å støtte opp om og styrkje deira arbeid og livskraft.

§ 2. Partseigarar; stemmerett og ansvar

1. Privatpersonar, kommunar og andre private og offentlige institusjonar kan eige partar i Bakkejekta.
2. Parthavarar som har betalt partsbrev har stemmerett på årsmøtet ved personleg frammøte, eller ved å gje skriftleg fullmakt.
   1 part gjev 1 stemme, avgrensa oppover til 5 stemmer på kvar partshavar.
   Parthavarane sitt ansvar er avgrensa til innbetalte partar.

§ 3. Årsmøte

1. Årsmøtet er partslaget sitt øvste organ og skal haldast innan utgangen av mai månad kvart år. Innkalling med saksdokument og framlegg til saksliste skal sendast til partseigarane minst 2 veker før møtet.
   Å rsmøtet skal kunngjerast i lokalpressa og på partslaget si heimeside, www.bakkejekta.no , minst 2 veker før møtet.
2. Årsmøtet skal handsame årsmelding, innkomne forslag, samarbeidsavtaler med og/eller tilslutning til andre organisasjonar, revidert årsrekneskap, arbeidsprogram og budsjett, val av styre, valkomité og revisor.
   Saker som ein ynskjer tekne opp i årsmøtet må vere sendt til styret seinast 4 veker før årsmøtet.
3. Avstemmingar vert avgjort med vanlig fleirtal, ved like stemmetal vert utfallet avgjort med loddtrekking. Stemmegjeving skal vere skriftleg dersom ein partseigar krev det.

§ 4. Styret.

1. Årsmøtet vel eit styre som skal ha 5 medlemmer, kvar med funksjonstid på 2 år,
   og 3 varamedlemmer, kvar med funksjonstid på 1 år.
   Av styremedlemmene vel årsmøtet ein leiar for 1 år.
   Høvesvis 2 og 3 styremedlemmer er på val kvart år.
   Første ordinære årsmøte peikar ut 2 styremedlemmer med 1 års funksjonstid.
2. Styret tek vare på partslaget sine interesser mellom årsmøta, og representerer laget.. Styret gjer sine vedtak med vanlig fleirtal. Ved stemmelikskap har styreleiar dobbeltstemme. Styret er vedtaksført når minst 3 medlemar er til stades.
3. Styret tek opp saker i samsvar med partslaget sitt føremål og vedteke arbeidsprogram.
   Styret fører og rekneskap for partslaget og legg dette fram for årsmøtet saman med arbeidsprogram og budsjett.
4. I saker som normalt skal handsamast av årsmøtet, og årsmøtet ikkje vert innkalla på grunn av tidsfaktoren, kan styret gjere vedtak når alle styremedlemane er samde. Slike saker skal likevel handsamast på første ordinære årsmøte etterpå.
5. Styret skal meddele prokura. Styret kan også oppnemne råd/utval og delegere myndigheit til disse.
6. Styret kallar inn til årsmøte i samsvar med vedtekter for partslaget.

§ 5. Endring av vedtekter.

Vedtektsendringar kan berre gjerast av ordinært eller ekstraordinært årsmøte etter å ha vore oppført på sakslista, og krev minst 2/3 fleirtal.
Endring i §§ 1 og 6 må vedtakast i 2 påfylgjande årsmøte med 2/3 fleirtal for å være gyldige.

§6. Oppløysning av partslaget.

Vedtak om oppløysing av Partslaget Bakkejekta, eller overføring av heile eiga, kan berre gjerast med 2/3 fleirtal på ordinært årsmøte, og i tillegg med 2/3 fleirtal på påfylgjande ekstraordinært årsmøte.
Vedtak i tråd med dette skal gjerast med eit tidsrom på min. 2 månader mellom ordinært og ekstraordinært årsmøte.

Vedtekne på årsmøte i Partslaget Bakkejekta 12.11.2004