Logg 2009 – Logg 2008 – Logg 2007 – Logg 2006

Seglkurs på vårvakker Dalsfjord!

Bytur med jekta 29. juni – 4. juli 2007

I vår vart vi invitert av Bergen Kystlag til å segle saman med jekta ”Den Gode Hensigt” første veka i juli. Etterkvart fann vi ut at vi kunne kombinere den turen med ein generalprøve på bytur med jekta i helga i forkant. I løpet av mai og juni hadde vi på dugnadene laga lemmar over ballasta bak masta og gjort ein del anna tilriggingsarbeid på jekta.

Fredag 29. juni 2007
Avgang frå Jensbua kl. 17 01
Mannskap: Anders Pihl, Ove Losnegård, Asbjørn Igelkjøn, Arthur Boge, Bjarne Akse, Oddvar Åsnes og Jofred Åsnes. Gaute Losnegård kom ombord på Vårdalsneset. Markvard Eikerol slepa oss til Sylvsteinen med påhengsen i nordleg lett bris, så overtok ”Afrodite” (Laila og Kjell Åsnes) ut til Leirvåg på Atløy – tusen takk til dei!

Frå Atløy segla vi vakkert i nordleg laber bris sørvestover mot Solund. Vi segla gjennom Skomakaren 20 30. På veg gjennom Lågøysundet fløytte vi på gudmor Gudrun, og ho kom ut på altanen og vinka til oss.

22 45  Vi segla til kai på Litle Færøy  

Her vart vi svært godt tekne imot av Roar, Jon, Kjersti og Margit, som hadde laga fiskerisotto til ein svolten kargjeng. Eit herremåltid med god prat til – tusen takk!

Den nordlege vinden stod etter at sola hadde gått ned, så vi bestemte oss for å segle vidare i natta. Roar Moe mønstra på.

Laurdag 30. juni 2007
00 00  Avgang Litle Færøy         
02 30  Vi passerte Trongen og kom ut i Sognesjøen

Vinden stilna av utover natta, og litt før 05 00 byrja vi å ro over svartestill Sognesjø. Nydeleg natt! Straumen rann nordover, så det var så vidt det gjekk på fram. Ove gjekk då i Humla (10 fots gummibåt med 4 hk motor) og slepa i 2 timar til moloen på Byrknesøy.

08 00  Ank. Byrknesøy     

Etter ein fin pause, litt proviantering og kvile kom Harald Bremnes (syskenbarn til Arthur) med båten sin. Han slepa oss ut i Fensfjorden – tusen takk! – der ein laber nordleg bris tok oss vidare i 2 – 3 kops fart mot Fedjefjorden. Mannskapet var noko trøtte etter natta, men stemningen var god om bord, og vi gledde oss til å lense mot byn. Men så – litt sør for Fedje – dreia vinden over på sørvest. Vi prøvde å halde høgde, kryssa litt, men såg at vi ikkje ville kome oss ut på byn i kveld. Vi fall difor av og kom til

18 45  Fedje, Kremmerholmen

Inn til Fedje hamn kryssa vi mellom stengene og det gjekk fint på 2. forsøk. Godt mannskap!

Sundag 1. juli 2007
Anders og Ove låg om bord – vi spente ei år frå vengtaket til masta, la presenning over og heiste seglet litt opp. Så låg vi på ballastflakane – nydeleg!

Dei andre – Oddvar, Gaute, Asbjørn, Gaute, Bjarne, Arthur, Roar og Jofred – leigde havbu på Kremmerholmen. Vi andre fekk lov å stelle og dusje oss der.

Nydeleg morgon – berre slakk og skiftande nordleg grel, men slørskyer på himmelen – blir det verskifte?

Oddvar, Jofred og Anders mønstra av og tok ferje, buss og båt til byn og heimatt. Dei hadde berre helga og skulle på arbeid måndag. Tusen takk for flott innsats, godt humør og fin tur!

Vi andre for på guida tur med bygdebokforfattarkollega av Gaute – Arvid Skogset – tusen takk for flott og innhaldsrik tur!

16 10  Avgang Fedje
16 20  Sette segl  

Platt lens sør Fedjefjorden med 3 – 4 knop. Vinden slakna av då vi gjekk inn ved Skjelanger, så vi sette Humla i gang med å få oss inn til

22 00  Herdla  

Her la vi oss i jekta alle utanom Arthur, som sette opp telt på kaia. Vi strekte seglet framom masta og ei år bakom. Gaute la seg på vengtaket(!). Om natta kom regnet, og Asbjørn spratt opp, for rundt som ein kvit tornado og strekte presenning over seglet. Takka vere han vakna vi rimeleg tørre om morgonen.

Det var slutt på maten etter kvelds – ein skalk, eit eple og 2 kvalpølser frå Fedje var att.

Måndag 2. juli 2007
Ove og Gaute sette avgarde på handleekspedisjon på morgonkvisten med gummibåten Humla. Rossland på Holsnøy var næraste butikk – kor blir det av kaibutikkane i Hordaland? Ekspedisjonen tok 2 ½ time – så frukost 11 30. Nokre av oss gjekk på Herdla Museum (kanskje mest for å gå på do?), og vi vart intervjua av lokalavisa Askøyværingen.
Sjå reportasjen her

13 25  Avgang Herdla 

Flau til lett bris på Hjeltefjorden. Vi bestemte oss for å snu stamnen nordover att, sidan det var meldt søraustleg vind fleire dagar fram. Så nær Bergen – og så vart det ikkje likevel! Men humøret var bra og vi såg fram til å segle i farvatn med butikkar på kaiene!

14 40  Vi passerte Medfjordbåen       

Fin, men sakte lens nordover Hjeltefjorden, så gjekk vi inn ved Austrheim og krongla oss nord ei lei forbi Rebnor og Sævrøy. Spennande, med store utfordringar til navigatørane /Roar og Asbjørn), høvedsmann (Arthur) og rorskarar (Bjarne og Ove). Vi kom til slutt utatt i Fensfjorden. Like før Vikingnes i Gulen stilna vinden heilt av, så vi kveikte Humla og let den surre oss inn til Vikingvågen.

Planen hadde vore at Rolf Losnegård og Ove Myklebust med ”Maksver” skulle gå frå Dalsfjorden kl. 12 00 denne dagen for å møte oss og vere følgjebåt resten av turen. Så fekk Maksver motortrøbbel, så dei vart ein del forseinka. Men dei møtte oss utanfor

22 45  Vikingvågen 

23 30  Dei slepa oss i motvind til Mjømna 

Vi la oss saman i flytebryggjene på Mjømna. Ove, Ove og Asbjørn låg i jekta, resten i Maksver.

Tysdag 3. juli 2007
Litt regn om natta, men vi låg tørt under segl og presenning. Gaute mønstra av om morgonen og tok rutebåten nordatt. Tusen takk for flott innsats, Gaute! Til vår store overrasking og mykje lått oppdaga vi følgjande vesle notis i BT under ”Havnen”:
Bradbenken: Bakkejekta kom lørdag og går videre i dag kl. 20 00. Truleg er grunnen ein epost Ove sende til Bergen Hamnevesen med førespurnad om kaiplass, men vi kosa oss i alle fall mykje med dette provet på at vi har vore i Bergen!

12 00 Avgang Mjømna

Søraust bris. Vi segla nord Mjømnesundet. Ove L. var i følgjebåten Maksver. Flott segling til Skjerjehamn, der vi såg oss om og fekk flott omvising av byggmeister Arve Mjømen – tusen takk! Vi var alle imponert over det dei held på å få til i Skjerjehamn – sjå www.skjerjehamn.no – høg kvalitet på alt vi såg. Gratulerer!

14 10 Avgang Skjerjehamn

Litt segling og litt sleping.

16 00  Ank Glavær

Glaværet var jektehamn i gamle dagar, og det ville vere rart om ikkje gamlejekta hadde lagt her på sine turar til byn. Vi skreiv ei pen helsing til Straume, som stod på døra til det flotte, gamle huset, og hengde den på døra ilag med ei jektehue. Tusen takk for oss!
Vi laga og åt middag på Glavær.

19 00 Avgang Glavær

Jekta vart rodd ut frå Glavær mot nord og vest. Vel ute på Sognesjøen stod vinden frå nord, så jekta vart slepa nord under Nesøy i Solund. Frå der sigla ho til innløpet på Indre Steinsund, der vi tok oppatt slepet.

21 30  Ank. Hardbakke

Vi avslutta ein fin jektedag med eit herremåltid på Solund Bryggje – fiskesuppe, breiflabb og brosme – fantastisk godt og veldig god service! Terningkast 6!

Roar mønstra av her og for heim til Litle Færøy – tusen takk for flott innsats!

Ove & Ove låg i jekta, resten i Maksver.

Onsdag 4. juli 2007
Stille, overskya, regnbyger.

12 00  Avgang Hardbakke   

Etter god frukost i Maksver, rodde vi ut sunda og vart slepa i rett motvind opp til vestsida av Færøy (sør for Lågøy). Rolf og Arthur i Maksver. Der gjekk vi i land og gjekk opp til hola i fjellet. Hola er som ein katedral, men det er svært trongt å presse seg inn. Sjølv om kosthaldet om bord hadde vore godt, kom alle seg inn. Spektakulært, og med flott utsikt over skipsleia over mot Indrøy og Oddekalv.

15 40  Avgang Færøy   

I stilla slepa vi nordover. Passerte

17 00  Skomakaren

Vi prøvde å sigle nord for Ospa, men vinden datt heilt av, så vi slepa inn bak Hamneholmen i Aralden og åt fiskesuppe der (Nydeleg, Arthur!). Vinden kom litt frå sørvest etter kvart, så vi sløra og lensa sakte innover mot Fureneset. Like før Fureneset gav vinden seg, så vi slepa heimatt inn Dalsfjorden. Maksver og Rolf mønstra av i Vårdal – tusen takk for flott følgjeteneste, godt kameratskap og mannskap!

23 00  Ank. Jensbua  

Sjølv om vi ikkje nådde byn, meiner underteikna at vi hadde ein svært lærerik og minneverdig tur. Ikkje den store vinden, men vi har fått god segltrening under rolege tilhøve, og både mannskap og høvedsmannsemne har fått prøve seg på orden, system og kommandolinjer. Og ikkje minst har vi fått lære kvarandre å kjenne litt betre.

Takk til alle som var med og gjorde første langturen til Bakkejekta mogeleg! Takk til alle fram med leia som har teke vel imot oss, til Rolf og Maksver for god følgjeteneste og til Jon og resten av gjengen på Litle Færøy for nydeleg middag fredag kveld.

God sommar frå loggførar Ove Losnegård

Her kan du lese dagboka (og sjå bilete) frå ein av mannskapet, saksa frå bygdeavisa "6982"

  Bilete frå byturen

Opning av Dalsfjordveka 2007 i Rivedal

Fredag 3. august 2007
20 00 Avgang Jensbua

Oddvar Åsnes, Asbjørn Igelkjøn, Jofred Åsnes, Norman Vik, Oddvar Vassliås, Marit Hammer, Arnulf Elle, Arthur Boge, Bjarne Akse og Ove Losnegård (høvedsmann).

Vi var invitert til Rivedal denne kvelden for å kaste glans over opninga av Dalsfjordveka ved støtta over Ingolfr Arnarson.

Vi rodde over fjorden (i vindstilla) på knappe halvtimen, men så kom ein liten vind så vi fekk slått nokre slag fram og attende framfor Ingolfen.
Vi la til land ved Berget, og mannskapet gjekk opp til Ingolfen for å få med oss programmet. Vakker song og musikk og tale av islandsk lagtingskvinne før vi heiste segl for å vere med på kveldens storhending: Det nye lyset på Ingolf Arnarson vart sett på, og vi fekk og lys på seglet utpå fjorden. Vakkert, sa dei som såg det frå land. Så sette vi mot aust att, slo nokre slag, men så la vinden seg heilt. Med fullmånen rett i stamnen kosa vi oss med årane heimatt til Jensbua.
På heimturen var Oddvar Vassliås mønstra av og Ingrid Hansen komen om bord.
00 30 ca .Ank. Jensbua

Fleire bilete finn du her

Kystkulturdag på Jensbua

Sundag 5. august 2007
Dagen kom med skydekke nedom nasetippen og jamt regn. Det var meininga å gå turar med jekta, men veret var så dårleg at vi avlyste. Men mannskapet stilte likevel, hjelpte til på Jensbua, selde effektar og bidrog elles til at dagen vart fin – innadørs!

Mannskap: Asbjørn Igelkjøn (høvedsmann), Jofred Åsnes, Arthur Boge og Inge Hansen

Om kvelden stilte partslaget for å selje mat på forteljarkvelden. Her var Oddvar Åsnes høvedsmann, med Jofred Åsnes, Are Morten Follevåg, Arthur Boge, Asbjørn Igelkjøn og Ove Losnegård var mannskap. Fullt hus, mykje gode historier og lått. Medarrangørar var Fjaler Sogelag og Stiftinga Jensbua.

Kobbeskjerkveld i Flekkefjorden

Fredag 10. august 2007
18 00 Avgang Jensbua

Vi var invitert av Jakob Sande-selskapet til å vere med å skysse folk til Kobbeskjeret for allsong, noko som er vorte tradisjon. Vi var med i fjor og.

Mannskap: Arthur Boge (høvedsmann), Ove Losnegård, Jofred Åsnes og Asbjørn Igelkjøn.

Vi sigla platt lens inn til Haugland i godveret – sørvestleg bris og sol. Vi tok om bord 10 passasjerar – dei fleste nye UWC-elevar – og siglde inn til Kobbeskjeret på om lag ein halv time.

Etter allsongen rodde vi utatt med motorhjelp frå ”Vestavind” ved Hallvard Hauken – takk!
21 30 ca. Ank. Jensbua

Loggførar: Ove Losnegård

Fleire bilete finn du her

Gaularspelet 2007

Laurdag 11. august 2007
09 00 Avgang Dale

Til Gaularspel og Vikingfestival i Osen, invitert av Gaularspelet. Mannskap er Anders Pihl (høvedsmann), Jofred Åsnes, Asbjørn Igelkjøn og Ove Losnegård.
Låge skoddeskyer og for lite vind til å sigle. Vi slepa med Buster med 40 hk, beste fart vi kunne oppnå var 5 knop. Med gummibåten Humla bunden på sida gjer vi om lag 4 knop utan motvind og straum, og det er svært mykje meir behageleg. Kanskje ei brukbar løysing er ein liten spesialbåt/livbåt på sida – i alle fall når det ikkje er sjø.

11 30 ca. Ank. Osen

Gaute Losnegård mønstra på. Til vår undring vart vi plassert i Bogjen, om lag 500 m frå vikingleiren og spelet – ikkje ved kaia i elva slik vi hadde trudd. Det var visst vanskelege straumtilhøve i elva som var grunnen til dette.
Helge Kårstad med ”Bygstadskipet” tok vel imot oss, og saman med oss var og Hallvard Hauken med 3 båtar som han har bygt.
Vi rigga opp stand og selde effektar, tilbaud turar og fortalde. Ikkje så mykje folk, og regnbyger utover dagen. Vi avslutta om lag 18 00 og for utatt fjorden med Busteren for å sjå West Side Story på Kyrkjebakken i Askvoll.

Sundag 12. august 2007

11 00 Avgang Jensbua med Busteren
11 45 Ank. Osen/Bogjen
                    
Mannskap: Asbjørn Igelkjøn (høvedsmann), Jofred Åsnes, Gaute Losnegård og Ove Losnegård.

Skya, men fint og varmt ver. Vi annonserte tur over høgtalar i vikingleiren, og fekk fullteikna (18!) tur kl. 14 30. Mest roing – litt segling.
Ove laga småjekter begge dagane. Vi avslutta 17 30.

18 05 Avgang Ose

Gummibåten Humla på sida, 4 hk, 4 knop.

21 30 Ank. Jensbua                          

Loggførar: Ove Losnegård

Fleire bilete frå Bakkejekta på Gaularspelet finn du her

Undervisning og formidling av den tradisjonelle kystkulturen i Sunnfjord og Ytre Sogn  - eit undervisningsprogram med Bakkejekta om jektefarten i regi av Den kulturelle skulesekken. 23.– 24. august 2007

Våren 2007 inngjekk Partslaget Bakkejekta avtale med fylkeskommunen om eit undervisningsprogram for 5-7. klasse hausten 2007. På denne turneen skal vi vitje Ytre Solund, Hardbakke, Bulandet, Atløy, Askvoll, Holmedal, Gjelsvik og Våge skular, og prøve etter beste evne å formidle historia om Bakkejekta, jektefarten og handverket.

For også å gje elevane eit innblikk i handverket bak ei jekt, får kvar elev lage ein modell av Bakkejekta. Vi har laga halvfabrikata, som elevane kan arbeide vidare vidare med medan vi snakkar om jektefarten i gamle dagar. Og så får dei sjølvsagt ro og sigle!

Sjå også om skulesekk-ferda her

Torsdag 23.august 2007
Etter intensive førebuingar var både vegleiarar og elevar forventningsfulle og spente til den første undervisningsdagen med Bakkejekta. Ove Losnegård hadde laga mange modellar av Bakkejekta på førehand og saman med Asbjørn Igelkjøn segla han dessutan Bakkejekta frå Jensbua til Litle Færøy onsdags ettermiddag og kveld. I eit nydeleg augustvær kom dei til Solund ein time etter solnedgang. Etter ei god matøkt planla vi undervisninga og fordelte undervisningsoppgåvene mellom oss.

Foto Svanbjørg Sverrisdottir

Torsdagen kom med godt vær og ein svak nordvestleg vind. Vi rigga oss til med langbord og godt arbeidslys i naustet. Om lag klokka 9.00 kom 5.-7. klasse ved Ytre Solund skule med skyssbåten. Det var ei lita gruppe på 6 elevar, og dei entusiastiske lærarane Svanbjørg Sverrisdottir og Lisbeth Bygstad ville også lage sine eigne småjekter. Først vart jektene pussa og stellt med små høvlar og sandpapir. Så vart mastefeste nøye utmålt og navaren var god til å bore hol til masta. Ove hadde saga opp gode masteemne og desse vart spikka til og pussa etter beste evne. Ei markert utskjæring og ei fin tilpassing av saling (punktet der tauverket til ståande rigg vert festa) vart nøye utført. Likeeins vart råa laga,- og den skal sjølvsagt vere litt tynnare i endane enn på midten. Råa er stokken som råseglet skal henge i.
Vidare brukte elevane ein mal til å skjære ut seglet. Ove hadde funne ein rull tjukt gråpapir som tidlegare vart nytta til veggtapet. Dette var stivt og hadde ein flott og fin bus i seg. Etterpå stakk vi hol i den øvre delen av seglet og surra det til råa. Så festa vi små stiftspikar i stevnen, på sidene og bak på vengen. Dette var festepunkt for stag, vant og takkel som vart nitidig montert med fint seilgarn. Til slutt vart ”rederimerket” Bakkejekta stempla på akterspeilet før endeleg sjøsetting og prøveseglas fann stad på flytebrygga på Litle Færøy.

      
Foto Svanbjørg Sverrisdottir

Etter ein litt forsinka føremiddagsmat, gjekk alle om bord i Bakkejekta for å føre ho frå Litle Færøy til Hardbakke. Vinden hadde auka til ein lett til laber nordleg bris. Eit perfekt utgangspunkt for seglasen. Asbjørn Igelkjøn var høvedsmann, Rich Lennox halskar og Roar Moe stod for dei faglege kommentarane. Elevane fekk oppgåver med å ro, vinde (hale opp) seglet, passe skauta, sette halsen og passe boline og priar.

Foto Svanbjørg Sverrisdottir

Vi forlot Litle Færøy kl. 12.45 og med ein fin akterleg vind (skautvind) segla vi i 3 knops fart gjennom Liasundet og gjennom nordre innløpet til Hardbakke hamn. Vi tok i hop (tok ned seglet) inne på Hardbakkevika og rodde oss til kai om lag kl. 13.50. Etter å ha gjort Bakkejekta ship-shape (alle ting fint og på rett plass, alt tauverk kveila og båten rein for rusk og smuss) reiste ein  gjeng småjektefolk med småjekta under armen med skulebussen frå Hardbakke til Ytre Sula kl.14.25. Bakkejekta vart liggande med kaien for å vente på mellomsteget ved Hardbakke barneskule neste dag.

Foto Svanbjørg Sverrisdottir

Fredag 24. august 2007
I dag var det mellomsteget ved Hardbakke barneskule som skulle ha jektedag. Sidan 4. klasse var slått saman med 5 klasse, var det naturleg at 4. klasse også var med på opplegget. Vi delte dagen i to økter,- ei før føremiddagsmat om lag klokka 11.00 og ei etter. Kl. 09.00 møtte Roar Moe alle elevane saman med læararane til ein kort informasjon om dagen. Deretter delte vi oss i to grupper:
Gruppe 1 (4. og 5. klasse) gjekk om bord i Bakkejekt.a
Gruppe 2 (6. og 7.klasse) gjekk til sløydsalen på Ungdomskulen for å lage småjekter.

Foto Magne Hamre

Med sol og lett nordleg bris starta gruppe 1 å ro jekta rundt holmen på Hardbakkevika. Vidare hadde elevane rortørn under kyndig vegleiing av høvedsmann Rich Lennox. Alle fekk ro og styre og totalt rodde vi tre runder rundt holmen før Helge Indrøy kom med sjarken sin og taua oss midtveis nord i Liasundet. Med lett akterleg nordleg bris sette vi segl, styrde halsane og skifta på dei ulike mannskapsoppgåvene. Roar Moe var halskar og snakka litt om kva jekta vart nytta til i tidlegare tider. Etter ein roleg seglas rodde vi oss inn Hardbakkevika og til kai.
Elevane gjekk tilbake til skulen for å ete formiddagsmat, medan skuelystne 1.klassingar og ungar frå Barnehagen fekk kome om bord i Bakkejekta. Dei undra seg kvifor ikkje kaptein Sabeltann var med, men slo seg til ro med to heller langhåra medlemmar i mannskapet.
Gruppe 2 var saman med Asbjørn Igelkjøn og lærarane i sløydsalen og laga småjekter. Sjølv med flittige hender og stor innsats lukkast det ikkje på den korte tida å gjere småjektene heilt ferdige, men dei plasserte farkostane i skapet for å gjere dei ferdige og seglingsklare i neste sløydtime.

Foto Magne Hamre

Den andre øka tok til kl. 11.45. Arbeidsoppgavene var dei same, men sidan nordavinden vart litt friskare slepte Helge Indrøy oss heilt fram nord til Taskholmen fyrlykt. Seglasen til Hardbakke gjekk fint der elevane fekk prøve seg på dei ulike mannskapsoppgåvene. Litt undervisning undervegs om grunnleggande segltrimming. Asbjørn meldte om stor innsats og stor iver blant småjektebyggjarane, men at dei også har litt etterarbeid å gjere i neste sløydtime før småjektene var ferdigstillte.

Bakkejekta vart klargjort og flytta til Taklekaia der den neste dag skulle vere med på Næringsdagen i Solund. Etter avslutta arbeidsøkt, vart mannskapet invitert til ein kopp kaffi og hyggeleg prat i havseglaren til rådmann Rolf Bjarne Sund. Ei god avrunding på ein god dag.

Loggførar: Roar Moe

Den Kulturelle Skulesekken hausten 2007 – vi seglar vidare til Askvoll Skule

Torsdag 6. september 2007
Mannskapet og hjelparane stod opp i 07-tida til ein grå og disig morgon. Bakkejekta kom onsdags kveld til båthamna i Askvoll og låg godt fortøydd ved Gjestekaien.
Roar, Rich og Are Morten møtte elevane i 5.og 7. klasse ved Askvoll skule i klasserommet klokka 09.00.
Roar fortalde litt om bakgrunnen for bygginga av Bakkejekta og litt historikk om kva og korleis jekta vart nytta i eldre tider på Vestlandskysten. Deretter fordelte vi oss i to grupper,- halvparten av 5. og 7.klasse gjekk med Rich og Roar til Bakkejekta, medan Are Morten tok med seg den andre delen til formingsrommet for å lage småjekter.

    
Foto Are Morten Follevåg

Av vel 20 elevar drog halvparten til sjøs med jekta medan dei øvrige budde seg på ei ykt på sløyden. Her skulle dei lage ein kopi av jekta og rigge denne med mast og segl. Elevane pussa og skroget vart glatta, dei smidde og masta vart rund, dei målte og streka, spikra og slo halvstikk. Til sist døypte vi kvar ei jekt og stempla "Bakkejekta" i hekken.

Vel om bord  i Bakkejekta fekk elevane litt meir bakgrunnskunnskap om segling av ei jekt i eldre tider. Deretter bar det laust med nøye instruksjon om korleis ein gjer klar årane og korleis roing og skåting/hamling vert utført. Høvedsmann Rich ga gode instruksjonar og vi snudde jekta inne i båthamnen og rodde oss ut på fjorden. Alle fekk prøve å ro, og sjølv med tunge årar klarte elevane å ro jekta i 1 til 2 knops fart. Rormann og utkikk var også ein del av oppgåvene. Etter 15 minutt med roing kom ”Penelope” med skipper Steinar Jørs for å sette tamp i oss og taue oss i retning Sauesundet. Vi ynskte å segle unna vinden og gjere seglemanøvarar som kuvendingar (”gå under stag”) heim att til båthamna.
Elveane vart delte i parvise grupper. Høvedsmann Rich tok seg av rettleiinga i akterskipet og halskar Roar hadde ansvaret for at alt skulle gå rett føre seg i framskipet. Parvis vart oppgåvene fordelte:

1. ansvar med å handtere, sette og stikke bolina og hjelpe halskarane med å sette spøta
2. ansvar med å flytte halsane og sette spøta
3. ansvar med å vinde (hale opp) seglet og ta i hop (ta ned seglet)
4. ansvar med å handtere skauta (skjøte) som styrer seglet ved ulike vindretningar
5. ansvar for priaren og roing i tilfelle vi treng å gå over stag (stagvending)
6. ansvar for å styre (rormann) og passe kurs og navigasjon (utkikk i baugen)

Etter drilling og spørsmålsrunder om babord og styrbord, bar det laust med at høvedsmannen ga klar ordre om: ”Kvar til sitt,- og no vett vi!!!”
Halsen på seglet vert sett på styrbord hals, halskarane kløyver vinden med stramt sidelik mot vinden og seglet vert vinda og heist heilt til rakken nesten når salinga. Opphalaren (fallet) vert festa med ein slippstikk i ein tapp under beten.
”Hal heim og fest babord skaut, stikk i bolina og gje litt i priaren” O`hoi vi seglar kontrollert. Med vinden inn på styrbord hals akter har vi skautvind,- og vips så er farten oppe 4,5 knop.
Konsentrerte og litt forbausa elevar skjønar at vi seglar, og ikkje minst registrerer dei kor fint Bakkejekta går i sjøen. Rormannen siktar mot radiomasta på Olsetlandet og utkikken korrigerer ustødig kurs med klar og fast røyst: ”Litt babord” ”Litt babord” svarar rormannen og korrigerer kursen. Mannskapet fungerer og lydar av sjøsprøyt møter baugen. Klar igjen folkens!!! Først litt førebuande rettleiingar om korleis ein manøver ”under stag” føregår. Høvedsmannen ropar: ”Pass på og kvar til sitt – vi gjer kuvending” Ny ordre: ”Vi går under stag”  Rormannen gjer godt utslag med roret og svingar styrbord. Babord hals vert gjort fri, høvedsmannen føl etter med brasen og når vinden er rett akterleg, vert spøta gjort fri på styrbord side og bolina vert sett laus. ”Stikk litt i priaren” Roar nikkar og er fornøgd med sjømannskapet.  Vi har ny kurs med vinden innpå babord side. No gjeld det å handle effektivt og raskt. Eine halskaren ber spøta/halsen fram på babord side og får hjelp til å sette denne. Han må ha litt hjelp. Det er litt vrient å finne holet og vinden i seglet gjer arbeidet tungt. ”Fast” ropar han høgt og styrbord skaut vert halt heim og sett fast når seglet har riktig trim (fasong) på denne vindretninga. ”Sett bolina” og brasen vert festa på kryssholtet på vengen på babord side. Ein kontrollert og flott kuvending. Terningkast 5. Rutinane er sette og vi byter på dei forskjellige arbeidsoppgåvene. Vi gjorde godt arbeid heile vegen, og når vi var omtrent 100 meter frå land så ropa høvedsmannen: ”Kvar til sitt, ta i hop” Seglet vart fira kontrollert ned og elevane hjelpte til med å berge seglet så det ikkje kom i sjøen. Årane kom i sjøen og vi rodde oss fint inn i båthamna. Etter at seglet og tauverket vart lagt fint på plass, var det tid for litt jektekost. Frå skipskista vart det funne fram spekekjøt, smør og flatbrød og dette smakte retteleg godt. Mannskapet takka for seg og elevane gjekk vegen til skulen og føremiddagsmat. Dei såg fram til bygging av småjekter i sløydsalen i den siste økta.

Neste økt starta om lag klokka 12.00. Gruppa som hadde laga småjekter i den første arbeidsøkta, kom om bord. Vi følgde same framgangsmåte og arbeidsrutinar. Først øvde vi roing og skåting inne på hamna, for så å verte taua over mot Atløyna. Vi sette segl og segla unna vinden tilbake. Undervegs la alle seg på tiljene i båten og berre lytta til bølgjene og lydande frå rigg og skrog. Eit stille og godt minutt. Vel i hamn vanka det jektekost og tilslutt gjorde vi båten ”shipshape” (seglet, alt tauverk og utstyr fint på plass) Vi beslo seglet og kaia det (la rå på langs inni båten)  I duskregnet takka elevane og mannskapet farvel og jektedagen var til vegs ende. Mannskapet fekk handla mat på butikken og hadde ein hyggeleg kveld om bord før dei tok kvelden og gjekk til køys i 22.30-tida.

Foto: Are Morten Follevåg

Fredag 7.september 2007
Regnværet heldt fram, og morgonen var minst like våt som i går. Etter frukost gjekk Roar til skulen for å møte 6. klasse ved Askvoll skule. I dag var det 6.klassen som skulle i elden og gjennomføre jektedagen. Ein hyggeleg gjeng som hadde førebudd seg godt med å ta med seg solid regntøy. Som i går delte vi klassen i to grupper. Rich og Roar hadde ansvaret for seglinga og Are Morten tok hand om arbeidet i sløydsalen.
Det er viktig med god informasjon i startfasen for det er mange nye ord og uttrykk å halde orden på. Deretter var det innlæring av korleis handtere årane slik at ingen får seg ein real springskalle, før vi til sist er klar til å ta dei første famlande åretaka. Det er ikkje alltid like lett skilje mellom babord, styrbord, ro, hamle eller skåte, men elevane tok det forbausande lett og vi rodde oss ut til  ”Penelope” som slepte oss ut mot Atløyna.
Vinden var vestleg med heftige kaste- og fallvindar, så vi bestemte oss for å ta to søft i seglet (redusere seglføringa med å ta inn/knyte inn to sett revtampar i seglet) Vi følgde det same opplegget som i går med å gå under stag i medvinden. Eit godt mannskap bytta på arbeidsoppgåvene og vel førnøgde tok vi oss med årane  inn i båthamnen. Deretter var det tid til litt oppsummering medan jektekosten gjekk ned på høgkant.

Vinden hadde ikkje løya utover dagen, så vi helt fram med to søft i seglet. Den andre gjengen kom om bord litt over klokka 12 og gjorde godt arbeid og viste evne til godt sjømannskap. Trygt og fint tok vi oss inn til båthamna, og trass i regn heile dagen var stemninga upåklageleg. Ein annleis skuledag gjekk mot slutten, og kanskje nye impulsar fra Bakkejekt-dagen har sett nokre små spor etter seg. Kanskje har den nære tradisjonelle kulturen og lokalhistoria kome litt nærmare og kanskje sådd ein liten spire til å mønstre Bakkejekta som mannskap med det første? Kven veit?


Foto: Are Morten Follevåg

Takk for flott innsats til både elevar og lærarar ved Askvoll skule og takk for to flotte dagar i lag.

Etter å ha vore på butikken og handla litt mat, slepte ”Penelope” Bakkejekta til Jensbua. Skodda kom tettare og vinden hadde auka i styrke. Frå Askvoll til Jensbua er det om lag 8 nautiske mil,- så etter ein halvannan time sleping var vi vel framme på Jensbua. Ein småkald Roar om bord i Bakkejekta var glad for at Bernhard Tysse hadde møtt opp for å hjelpe oss med førtøying og bære inn utstyret. Redningsvestar vart hengde til tørk og gode sneiar spekekjøt vart fortært før Roar Moe, Lill Nicolaysen og skipperen på ”Penelope” Steinar Jørs, sette turen mot Solund i 17.00-tida fredags kveld.

Loggførarar: Roar Moe og Are Morten Follevåg

Her finn du fleire bilete

Den Kulturelle Skulesekken hausten 2007 – vi seglar vidare til Holmedal Montessoriskule

Mandag 24. september 2007
Etter ein heller lang og omflakkande tur kom Roar seg til Lillingstonheimen søndags kveld. Are Morten hadde laga til ei god seng, så etter ei søvngod natt var vi klar til mandagen.  Denne dagen var det Holmedal Montessoriskule som stod for tur. Asbjørn Igelkjøn kom med båten sin litt over klokka 07.00, og vi fekk teke om bord seglet, redningsvestar og alt naudsynleg utstyr. Slepet gjekk fint og vi la oss til i vestre delen av båthamna i Holmedal.
Meterologisk Institutt hadde kulingvarsel for kysten, men inne i Dalsfjorden var det lageleg bør med vind frå søraust.

Foto: Gaute Losnegård

Ein av lærarane på skulen henta skipskista med verktøy og alle emnene til småjektene, og Gaute Losnegård kom og var med oss denne dagen.
Sidan det berre var 13 elevar i 5.-7.klasse, valde vi å vere i ei gruppe. Både Roar, Asbjørn og Gaute hjelpte til med å lage småjektene i den første delen av dagen. Skroget vart pussa, mastene og råa smidd og pussa, rigging og montering av seglet gjekk fint og til slutt vart ”rederimerket” til Bakkejekta stempla på akterspeilet.

Foto: Gaute Losnegård

Etter føremiddagsmaten gjekk vi i Bakkejekta for å praktisere seglkunnskapen vår. Litt roing først slik at vi kom oss godt ut av hamnen. Vinden var søraustleg så vi valde å gå høgste gong over Dalsfjorden i retning Straumsneset.

Foto: Gaute Losnegård

Elevane fekk prøve seg i dei ulike arbeidsoppgåvene, men etterkvart vi nærma oss sørsida av fjorden spakna vinden. Vi brukte ei åre til å gjennomføre stagvendinga. Første stagvendig kan alltid fortone seg kaotisk, så og denne gongen. Men vi fekk sett seglet fint, og i ein heller slapp bedageleg bris segla vi tilbake mot Holmedal. Ein liten rotur måtte til for å ta oss til kaiplassen.
Asbjørn og Roar fortøgde båten, la ut spring og gjorde Bakkejekta shipshape og klar til neste dag.

Den Kulturelle Skulesekken hausten 2007 – vi seglar vidare til Gjelsvik Skule

Tirsdag 25.september 2007
Værmeldingane for denne dagen var ille og dårlege. Sørvest stiv til sterk kuling,- periodar med liten storm på kysten. Asbjørn kom kl.07.30 til Jensbua for å hente Roar. Det var lite vind i området ved Jensbua, men når vi kom nærmare Holmedal slo sørvest-kulingen til med full styrke. Mykje tyda på at vi ikkje kunne segle i desse vindforholda. Vi valde difor å starte opp med alle elevane i sløydsalen i påvente av at vinden ville løye utover dagen. Rolf Losnegård kom for å hjelpe oss med transport av småjekte-emna.
Glade og interesserte elevar frå Gjelsvik skule kom til skulen i Holmedal med skulebussen. Sidan dei var 25 elevar, var vi nøydde til å halde på ei stram organisering. Midt oppi dette viste det seg at Roar hadde gjort kunststykket å gløyme segla som han hadde laga til på Jensbua. Asbjørn berga situasjonen med raskt å gå gang med å lage nye, medan Roar introduserte arbeidet og fortalde om Bakkejekta.
Trass i at det var heile 25 elevar, gjekk arbeidet svært greitt. Med stor iver arbeidde dei jamt og trutt. Dei ville heller arbeide enn å ha friminutt. Vinden hadde på ingen måte stilna og regnet pøsa ned framleis utover dagen. Det vart nok dessverre inga segling på Dalsfjorden denne dagen. Etter matfriminuttet tok Roar halve gruppa med seg  til båten. Bølgene var svære og jekta duva flott langs kaisida. Roar fortalde og viste elevane rundt i jekta. Dessutan gjekk han igjennom ulike namn og nemningar på rigg og skrog. ”Kvifor er det så mykje stein i båten? Og kva tyder teikninga på den spesielle steinen?” Mange nyskjerrige spørsmål vart stillte, og til slutt prøvde vi å få så mange som mogeleg inn i vengen. Vi klarde alle,- det vil seie 13 elevar. Det er førebels ny rekord.
Etterpå fekk den andre gruppa vere med på den same seansen. Begge gruppene fekk sjølvsagt smake jektekosten, noko som gjekk ned på høgkant.
I god tid før bussen kom var alle jektene ferdige og tekne med heim. Ingen fekk prøve seg i jekta under segl, men alle gjorde ein framifrå innsats som båt- og jektebyggjarar.
Denne dagen var journalisten Ingunn Osland frå avisa Firda med oss. Ho fotograferte og intervjua elevar, lærarar og vegleiarane til ein artikkel som skal kome i Firda laurdag 29. september. Bakkejekta vart liggande i Holmedal for å verte henta ein av dei komande dagane. Asbjørn tok båten sin heim til Flekke, medan Roar tok bussen til Askvoll for å ta ein svært moderne ekspressbåt i 36 knops fart til Solund.

Les artikkel i Firda frå måndag 08.10.2007

Her finn du fleire bilete

Loggførarar: Roar Moe og Are Morten Follevåg

Den Kulturelle Skulesekken hausten 2007 – vi seglar vidare til Bulandet Skule

Mandag 1. oktober 2007
Etter ein lang periode med intensivt regnvær og kuling både frå sør og nord, hadde meterologane gode meldingar for oss vestlendingar i veke 40.
Ove Losnegård nytta helga til å sage til resten av jektemodellane, og Steinar Jørs og Roar Moe tok ut frå Solund søndag ettermiddag for å slepe Bakkejekta fram til Bulandet. Ove kom slepande med jekta til møtes i Vilnesfjorden.

 
Foto: Astrid Thorsen Landøy                                            Foto: Are Morten Follevåg            

Vi vakna mandags morgon til opphaldsvær og ein lett til laber sørleg bris. Dei to andre hjelparane, Arthur Boge og Are Morten Follevåg, kom til Bulandet klokka 08.10. Vi hadde avtalt med ein av lærarane om å hente skipskistene med verktøy og utstyr kl. 08.30. Vi lasta skipskistene i bilen og dermed var vi gang med siste runde i prosjektet med Bakkejekta i Den kulturelle skulesekken.
Elevane kom til skulestart klokka 09.00, og vi samla 5.-7. klasse til informasjon og praktisk organisering av dagen. Roar fortalde om kor viktige jektene var i eldre tider når det galdt å få transportert fiskeprodukta til Bergen og Indre Sogn. Jektene var i fleire hundre år vår tids cargoskip.
Are Morten var med 6. klassen og lagde småjekter i klasserommet, medan Roar tok med seg 5. og 7. klasse om bord i Bakkejekta. Ivrige 6.klassingar gjekk med iver og lyst i gang med pussinga av jektene. Små høvlar, grovt og litt finare sandpapir vart inngåande nytta for å få skroget slett og fint. Are Morten demonstrerte grunnleggande arbeidsteknikk med kniv før ein tok til med spikking av mast og rå. Viktig at ein smir små spon, og snur og vender på emnet når ein treff på motved. Når mast og rå var ferdig, var det på att med heftig bruk av sandpapir. Vidare vart det spikka til eit hakk øvst i masta. Her skulle tauverket festast til det som heiter ståande rigg. Små stiftspikar vart spikra i båtdekket som festepunkt for tauverket. Straks vart stag, vant og takkel strekte opp, og ein fekk god øving å knyte dobble halvstikk. Så var det råseglet som må festast med tråd til råa og deretter bli knytt fast i masta. Nokre små detaljar til slutt: Den løpande riggen (tauverket vi styrer og trimmer seglet med) må knytast fast og ikkje minst så må Bakkejekta-stempelet pryde akterspegelen og skutesida.

Om bord i Bakkejekta er det grunnleggande viktig at rutinene vert fastlagde fra starten av. Arthur og Roar instruerte korleis ein handterer årane og korleis dei vert nytta til å ro, skåte og manøvrere. Alle får høve til å ro, stå til rors og vere utkikk. Så fekk vi slep forbi Hovden fyrlykt og sette segl tilbake til utgangspunktet. I laber akterleg vind la vi vekt på at alle fekk styre og vere utkikk. Komandolinene frå utkikken ga god øving i å skille mellom babord og styrbord. Undervegs tok vi fram nisteskrinet,- og både spekekjøt og flatbrød gjekk unna. Det smakte godt. 50 meter frå kaien tok vi ned seglet og sklei fint inntil. Bakkejekta vart førtøydd og klar til å ta i mot neste gruppe som skulle stige om bord etter føremiddagsmaten.

Klokka 12 starta andre økta. 5. og 7. klasse benka seg til langbordet i klasserommet, og 6. klasse var klar i Bakkejekta. Oppleggene var dei same som forrige arbeidsøkt, men no hadde vinden auka i styrke. Seglgruppa tok slep godt forbi Hovden fyrlykt til vi var på høgde med Sæingskjæra. Her sette vi segl og gjorde fleire kuvendingar. Då vi kom tilbake mot kaien hadde lasteskipet Ewos Express lagt til kai ved Fiskemottaket. Kraftig propellvatn frå sidepropellen gjorde manøveren til kai ekstra krevande og spennande. Sjølvsagt måtte ein god seglas feirast med jektekost mens vi låg ved kai. Elevane gjekk frå Bakkejekta etter at alt var shipshape kl. 14.05. Are Morten fekk tak i flott tørrsild hos Petter Nikkøy før han og Arthur tok hurtigbåten tilbake til Fjaler. Steinar og Roar byrja å slepe Bakkejekta frå Bulandet kl. 15.50. I lett sørvestleg bris gjekk ferda til Sauesundet på Atløyna der kom til havn om lag kl.18.10. Kontakta Finn Vågene i Sauesundet og fekk løyve til å ligge ved kaien hans. Både Penelope og Bakkejekta vart godt fortøydde og vi gjorde oss klar til å ta imot Atløy skule.

Foto: Astrid Thorsen Landøy

Her finn du fleire bilete

Den Kulturelle Skulesekken hausten 2007 – vi seglar vidare til Atløy Skule

Tirsdag 2.oktober 2007
Vi vakna denne dagen til ein nydeleg soloppgang,- og det var første gong i samband med denne Bakkejekt-seglasen. Dessutan var det ikkje eit vindpust å kjenne.
Arthur Boge og Are Morten kom frå Jensbua med hurtigbåten sin kl. 08.10. Etter ein kopp kaffi og litt rådslagning tok vi turen til Atløy skule. Der var arbeidsrommet gjort klart og etter ein tradisjonell introduksjon gjekk vi i gang med arbeidsoppgåvene. Dei 9 sjetteklassingane tok til med å lage småjekter, medan dei andre 9 elevane i 5. og 7. spaserte til kaien for å ta ut med jekta.

Foto: Are Morten Follevåg

Sjøen var speilblank og nydeleg å sette årane i. Med fin takt og god kraft i åretaka sklei Bakkejekta av gårde i 2 knops fart . Vi rodde på nordsida av nordre Sauesundsøy og etter ei stund fekk vi slep til Prestøy fyrlykt i håp om å finne litt vind frå søraust. Vi vinda seglet, men blei liggande å drive med straumen. Då høvde det godt å finne fram matkista. Spekekjøt, flatbrød og tørrsild vart godt motteke, og sjølvsagt måtte det i eit slikt høve forteljast nokre god skipshistorier. Vi tok i hop, la oss på årane att, men det siste strekket inn til kaien fekk vi eit kjærkomen slep.

 Foto: Steinar Jørs

Etter føremiddagsmat bytta gruppene. 5. og 7. klasse lagde småjekter, medan 6. klassen kom om bord. Ein liten søraustleg vind hadde teke seg opp,- så no kunne det la seg gjere å fylle seglet.
Vi rodde sørover gjennom Sauesundet. 6.klassingane rodde godt i motstraumen, og med god kommunikasjon mellom rormann og utkikk manøvrerte vi sikkert igjennom den ureine leia. Då vi hadde passert dei tre jernstakane, fordelte vi arbeidsoppgåver og vinda seglet.
”Kvar til sitt”,- og seglmanøverane gjekk fint, sjølv om vi måtte hjelpe oss med ei åre når stagvendingane skulle gjerast. Vi prøvde pine (holde maksimal høgde) jekta mot Sauesundet att, men vinden var for svak og straumen for sterk. Vi måtte ta i hop seglet og ro oss den siste etappen heim. Litt jektekost var god motivasjon som framskaffa den nødvendige energien.
Elevane sa dei hadde hatt ein flott og annleis dag, og tusla heim etter ein dag der vi ”har gjort lokalhistoria vår”. Arthur og Are Morten tok speedbåten heim til Jensbua, medan Steinar og Roar gjorde klar for nytt slep. Vi la ut i frå Sauesundet kl.15.30 og var ved kai på Grytøyra litt før butikken stengde kl. 17.00. Våge skule er den siste skulen som skal vitjast i denne omgangen.

Her finn du fleire bilete

Den Kulturelle Skulesekken hausten 2007 – vi seglar vidare til Våge Skule

Onsdag 3.oktober 2007
Nok ei fin solrenning med ein mild søraustleg bris ut Dalsfjorden. Alt frå morgonen av låg alt  vel til rette for ein fin dag i jektefarten sitt teikn. I dag kom Are Morten og Arthur landevegen med bil. Skulen starta klokka 09.00 og vi var som vanleg klar i klasserommet. Våge skule hadde tjuvstarta litt tidlegare med å lage småjekter. I samband med anna undervisning var dei godt i gang med sjølve arbeidet. Nokre av elevane hadde til og med starta å hole ut sjølve jekterommet. Spennande. Are Morten var også i dag i sløydrommet, medan Arthur og Roar var om bord i Bakkejekta. 6.klasse starta i Bakkejekta. Dei var flinke til å ro og manøvrere og vi rodde tvers over vågen i Grytøyra og forbi Kåtlaupneset. Her fekk vi slep inn til Fureneset fyrlykt og her gjekk seglet til topps. I søraustleg lett bris gjorde vi kuvendingar tilbake mot utgangspunktet. Seglet vart teke i hop og berga like før vi kom fram til kaien. Nydeleg sklei vi inn til kai og førtøydde.
5. og 7.klassen som hadde vore i sløydrommet, kom til kaien kl.12.15. Vi fordelte oss parvis og byttest om å ro. Vinden hadde no snudd til sørvestleg retning, så vi valde å ro langs med landet på sørsida av vågen. Her er det grunt og fleire skvalpeskjær å passe seg for. Utkikken var særs viktig og måtte heile tida vere observant. Alle fekk ro, styre og vere utkikk. Vi vinda segl og i lett SV-bris gjorde vi både kuvending og stagvendingar. Etter kvar vending gjekk vi ”Høgste gong” for å vere sikre på at vi hadde høgde nok til å komme oss tilbake til utgangspunktet. Ti slutt tok vi i hop og rodde til land, medan mannskapet fekk smake på spekekjøtet, flatbrødet og tørrsilda. Elevane syntes det var makalaust godt.
Då ungane var gått attende til skulen, vaska og spylte vi jekta, rydda litt og kveila opp alt tauverket.
Medan Roar og Steinar sette kursen med Seglskøyta Penelope mot Solund, sette Are Morten og Arthur segl for å segle Bakkejekta heim att til Jensbua. Både båt og mannskap skulle få ei velfortent og kjærkomen kvile.
Godt arbeid og takk for samsetaket alle i hop!!!

Loggførarar: Roar Moe og Are Morten Follevåg

Hjarteleg takk til Steinar Jørs og ”Penelope” for trufast følgje og godt sjømannskap gjennom heile seglasen i Den Kulturelle Skulesekken.

Heimatt til Jensbua……

15 00 Avgang Grytøyra

Etter ein flott Skulesekk-seglas er det no på tide å vende stamnen heim til Jensbua for vinteropplag.
Are Morten Follevåg og Arthur Boge tok ut frå Grytøyra, segla litt innover, men vinden datt heilt vekk. Då kom Ove Losnegård, assistert av dei 3 nye voluntørane i Fjaler: Katja, Anja og Philipp, til unnsetning med rask båt på hauststille og vakker Dalsfjord. Vi batt Busteren på sida, sette Yamahaen på om lag 2200 og stemna i om lag 4 knop til Jensbua.
Undervegs kosa vi oss med restar av Skulesekkmaten: Spikjekjøt, turkafisk og sild. Takk!

18 45 Til kai ved Jensbua

Her finn du av bileta frå heimturen

Partslaget Bakkejekta
Postboks 24, 6961 Dale i Sunnfjord
Bankkonto 3755.11.06749
Tlf. 57 73 90 20 Faks 57 73 90 21 Mobil 91 38 34 59
E-post: ove@jensbua.no